គិតមកដល់ម៉ោង ៦:១៥ នាទី ព្រឹកថ្ងៃទី ២៧ ខែកក្កដា​ ឆ្នាំ ២០១៨ នេះ ទឹកទន្លេសេកុង ក្នុងខេត្តស្ទឹងត្រែងហក់ឡើងហួសកម្រិតប្រកាសឱ្យប្រុងប្រយ័ត្ន

ស្ទឹងត្រែង៖ ក្រសួងធនធានទឹកអំពាវនាវឲ្យប្រជាពលរដ្ឋស្រុកសៀមប៉ាងប្រុងប្រយ័ត្ន ខណៈទឹកទន្លេសេកុង បានបន្តហក់ឡើងលើសកម្រិតបើគិតមកដល់ម៉ោង ៦:១៥ នាទី ព្រឹកថ្ងៃទី ២៧ ខែកក្កដា ឆ្នាំ ២០១៨ នេះ ទឹកទន្លេសេកុង ក្នុងខេត្តស្ទឹងត្រែង បានបន្តកើនឡើងដល់កម្ពស់ ១២,៤០ ម ហើយ (កម្ពស់ប្រកាសឱ្យប្រុងប្រយ័ត្ន ១១,៥០ម) ។ ពេលនេះទឹកបានបន្តលិចចូលផ្លូវ និងផ្ទះប្រជាពលរដ្ឋក្នុងស្រុកសៀមប៉ាងមួយចំនួនបន្ថែមទៀត ខណៈប្រជាពលរដ្ឋជាងមួយពាន់គ្រួសារ ត្រូវបានជម្លៀសទៅកាន់ទីទួលសុវត្ថិភាពជាបន្តបន្ទាប់ ។

សូមបញ្ជាក់ថាទឹកទន្លេសេកុងនេះចាប់ពីកម្ពស់១១,៥០ម៉ែត្រឡើងទៅគឺអាជ្ញាធរត្រូវប្រកាសឲ្យមានការប្រុងប្រយ័ត្ន និងត្រៀមលក្ខណះដើម្បីរកទីទួលមានសុវត្ថិភាព ។ ទឹកជំនន់ដែលបណ្តាលឲ្យជន់លិចនេះ គឺដោយសារទឹកជំនន់ដែលហូរចេញពីការបាក់ទំនប់ Se-Pian Se Nam Noi ក្នុងខេត្ត Attapeu ប្រទេសឡាវហូរធ្លាក់ចូលមកព្រំដែនប្រទេសកម្ពុជា ក្នុងស្រុកសៀមប៉ាង ខេត្តស្ទឹងត្រែង ៕