ថៃ៖ ក្មេងប្រុសទាំង ០៨ រូបដែលត្រូវបានយកចេញពីរូងភ្នំថាំលួង មានសុវត្ថភាពល្អ

(បាងកក)៖ ក្រុមក្មេងប្រុសដែលជាកីឡាករបាល់ទាត់សរុប ១២នាក់ និងគ្រូបង្វឹកពួកគេម្នាក់ដែលបានជាប់ក្នុងរូងភ្នំចាប់តាំងពីថ្ងៃទី២៣ ខែមិថុនាមកម្លេះនោះ ត្រូវបានក្រុមសង្គ្រោះនាំយកចេញបាន ០៨នាក់ហើយក្នុងចំណោម ១៣នាក់។ ទីបំផុតមន្ត្រីសុខាភិបាលថៃនៅថ្ងៃអង្គារដែលត្រូវជាថ្ងៃទី ៣ នៃការរំដោះនេះបានឱ្យដឹងថា ក្មេងប្រុស០៨នាក់ដំបូងគេដែលត្រូវបាន យកចេញពីរូងភ្នំថាំលួង នៅភាគខាងជើង ប្រទេសថៃមានសុខភាពល្អទាំងផ្លូវកាយ និងផ្លូវចិត្ត។ នេះបើតាមការចេញផ្សាយដោយសារព័ត៌មាន BBC នៅរសៀលថ្ងៃអង្គារ ទី១០ ខែកក្កដា ឆ្នាំ២០១៨។

Thai Football Youth was rescue from Tham Luang cave in mountain

ក្មេងប្រុសទាំង ០៨នាក់នេះត្រូវបានគេយកចេញពីរូងភ្នំថាំលួង កាលពីអាទិត្យ និងថ្ងៃច័ន្ទម្សិលមិញ បានទទួលការត្រួតពិនិត្យសុខភាព ដោយកាំរស្មីអ៊ិច និងការធ្វើតេស្ដឈាមដោយរកឃើញថា ក្មេងពីរនាក់ក្នុងចំណោមពួកគេធ្លាប់បានទទួលការព្យាបាលជំងឺរលាកថ្លើម ប៉ុន្តែសុខភាពរបស់ពួកគេ ហាក់ដូចជាមិនមានបញ្ហាចោទអ្វីធំដុំឡើយ ហើយនឹងស្ថិតនៅក្នុងមន្ទីរពេទ្យដើម្បីតាមដានសុខភាពបន្តរយៈពេលយ៉ាងហោចណាស់ ០៧ថ្ងៃទៀត។ បច្ចុប្បន្នក្មេងប្រុសទាំង ០៨នាក់ ត្រូវបានគេយកចេញពីរូងភ្នំថំាលួង ស្ថិតក្នុងស្រុកម៉ែសៃ នៃខេត្តឈៀងរ៉ាយ ភាគខាងជើងប្រទេសថៃ។ ចំណែកឯ ក្រុមអ្នកជួយសង្រ្គោះវិញសង្ឃឹមថា ពួកគេអាចនឹងជួយក្មេងប្រុស ០៤នាក់ និងគ្រូបង្វឹករបស់ពួកគេម្នាក់ ដែលកំពុងជាប់ក្នុងរូងភ្នំនៅឡើយ ចេញមកខាងក្រៅនៅថ្ងៃអង្គារនេះ៕